الحرب مش بس إخلاء مربع سكني تمهيداً لقصفه، ومش بس قصف مربع سكني دون إخلاء، ومش بس نسف بيوت، ومش صاروخ زنانه يحولك لأشلاء، ومش مسح لذاكرة المدينة والأحياء، ومش سماع دوي انفجار هائل يهز أعضاء المكان، ومش حدث أمني وكان ياما كان، الحرب مش بس هاي الأشياء..
النّزوح حرب، الخيمة حرب، فرن الطينه حرب، الفقر حرب، سعر القبر حرب، القهر حرب، من وين أجيب لسماكي حرب، دَبِّرنا يا بتحرقنا حرب، انصرفي على خيمة أهلك حرب، معيش أطعميكو حرب، مين حكالكو تخلفونا حرب، الانفجارات الاجتماعية حرب، سبعين في غرفة حرب، مراكز الإيواء حرب، انتحار الخصوصيه حرب، الدورة الشهريّة حرب، الدّور على الحمّام حرب..
يلعن الساعة اللي خلّتنا ننزح مع بعض حرب، اعملوا حسابكو بُكره فش فطور حرب، ايش بدنا نطبخ حرب، تأمين السيولة حرب، عصابات العمولة حرب، الفَقد حرب، موت أب حرب، أم بتجري عأيتام حرب، راح الولد حرب، راحت الدار حرب، ارتفاع الأسعار حرب، جلن الميّ حرب، الاستغلال حرب، الزعرنه حرب، البلطجه حرب، الجوع حرب، الاشاعات حرب، طخطخة العائلات والجنازات حرب، كيس الطحين حرب، صباحية العجين حرب، معيش أدفنهم حرب، كيلو البندورة حرب، البيّاع البومه حرب، ضرس التومه حرب، مكعب الماجي حرب، تأمين الخُبزه حرب، فت العدس حرب، القولون العصبي حرب، الأحزمة النفسيّه حرب، بابا بدّي حلاوة حرب، ماما بدّي جاجه حرب، نفسي ببيضه حرب، بدّي مصّاصه حرب، بدّي موزة حرب، الولادة حرب، نشف الحليب في بزازي حرب، البامبرز حرب، الأولويز حرب، إصابة غادرة بالإسهال والميّ قاطعه حرب، شحن البطارية حرب..
العتمه في الليل حرب، فتح صور الجوّال وذكريات زمان حرب، الأخبار الشالحه عن الصحه حرب، الإفراط في التفاؤل حرب، آخر حبّة ضغط في الشريط حرب، معلقة سكر في الشّاي حرب، إبرة أنسولين حرب، أنبوبة أكسجين حرب، توليع الحطب حرب، حكّة الجرب حرب، القمل في الراس حرب، الاولاد سنة أولى خيمه حرب، وسنة تانية حطب حرب، بعرفوش يمسكوا القلم حرب، نسيوا حرف الألف حرب، الخلاص الفردي حرب، ماما إيش يعني تفّاح حرب، دُش حمّام في الشّهر حرب، الجلي بميّة البحر حرب، توفّر كاش حرب، هادي المصاري بتمشيش حرب، عندك تطبيق حرب، كيف بدنا ناخدوا يغسل كلى حرب..
تنسيق سفر كيماوي الكانسر حرب، المخاطرة بالرّوح بالدّم عشان لقمة مغمّسه بالذّل حرب، المواصلات حرب، نقل الاصابات على كارة حمار حرب، المشي كيلوات حرب، قرصة البعوض حرب، مطاردة الفيران حرب، نبح الكلاب حرب، سفالة التّجار حرب، الزحمة حرب، النوم في الشّارع حرب، انهيار الأخلاق حرب، الحرمان حرب، قلّة الدخان حرب، الخذلان حرب، صراصير الليل حرب، طفح المجاري حرب، ريحة العرق حرب، النّوم على الفرشه حرب، سحكة الإف١٦ حرب، لا بلاش ليصير قصف وإحنا مش لابسين حرب، وَلِك مين حكالك تِحبَلي حرب، النّاس الزّومبي حرب، صراع الكوبونه حرب، سرقة الكرتونه حرب، بطّلت تشبهنا البلد حرب، لو صحلّك تهاجر حرب، مع الاحترام لكل الحروب هي الحروب ولا بلاش!
